پہاڑوں اوربالائی علاقوں میں برفانی تودے گرنے کے خطرے کا الرٹ جاری
اسلام آباد: (دنیا نیوز) این ڈی ایم اے کے نیشنل ایمرجنسیز آپریشن سینٹر نے پہاڑی اوربالائی علاقوں میں برفانی تودے گرنے کے خطرے کا الرٹ جاری کر دیا۔
این ای او سی نے ملک کے مختلف مقامات کے لیے 23 تا 29 جنوری موسم کے حوالے سے ایڈوائزری جاری کر دی۔
این ڈی ایم اے کے مطابق بالائی و شمالی علاقوں میں مغربی ہواؤں کے سلسلہ کے باعث اگلے 24 سے 48 گھنٹوں کے دوران مزید برفباری کا امکان ہے۔
گلگت بلتستان اور آزاد کشمیر کے پہاڑی علاقوں میں شدید برفباری متوقع ہے، خیبرپختونخوا کے پہاڑی و شمالی اضلاع میں برفباری کا امکان ہے۔
این ڈی ایم اے کے مطابق گلگت بلتستان، آزاد کشمیر، شمالی کے پی اور شمالی بلوچستان کے بالائی علاقوں میں برفباری کے بعدبرفانی تودے گرنے کا خدشہ ہے۔
برفباری سے پہاڑی علاقوں میں رابطہ سڑکوں پر ٹریفک کی روانی متاثر ہونے کا خدشہ ہے، 24 جنوری کے بعد ملک کے بیشتر علاقوں میں شدید سردی کی لہر کا امکان ہے۔
پنجاب کے میدانی علاقوں اور بالائی سندھ میں رات اور صبح کے اوقات میں شدید دھند کا امکان ہے، عوام برفباری اور دھند کے دوران کو غیر ضروری سفر سے گریز کریں، سفر نہایت ضروری ہو تو احتیاطی تدابیرضرور اختیار کریں۔
این ڈی ایم اے کے مطابق عوام دوران سفر انتظامیہ، ٹریفک پولیس اور قانون نافذ کرنے والے اداروں کی ہدایات پر عمل کریں۔
صوبائی ڈیزاسٹر مینجمنٹ اتھارٹیز کو ہنگامی صورتحال سے نمٹنے کی تیاری اور ضروری مشینری اوروسائل کی بروقت دستیابی یقینی بنانے اور برف ہٹانے والی مشینری اور ریسپانس ٹیموں کو الرٹ رہنے کی ہدایت کی گئی ہے۔
این ای او سی صورتحال کی مسلسل نگرانی اور ضروری معلومات کی متعلقہ اداروں تک بر وقت رسائی یقینی بنا رہا ہے، عوام موسمی صورتحال، ممکنہ خطرات اور حفاظتی تدابیر کے لیے“پاک این ڈی ایم اے ڈیزاسٹر الرٹ”موبائل ایپ سے رہنمائی لیں۔
