فیفا کپ 2026ء کے ٹائٹل کیلئے ہاٹ فیورٹ فرانس کو سیمی فائنل میں سپین کے ہاتھوں شکست
ٹیکساس: (دنیا نیوز) فیفا ورلڈ کپ 2026ء کے پہلے سیمی فائنل میں سپین نے شاندار کارکردگی کا مظاہرہ کرتے ہوئے ٹائٹل کی مضبوط امیدوار فرانس کو 0-2 سے شکست دے کر فائنل کیلئے کوالیفائی کر لیا۔
امریکی ریاست ٹیکساس کے شہر آرلنگٹن میں کھیلے گئے اس اہم مقابلے میں سپین نے ابتدا ہی سے جارحانہ کھیل پیش کیا، پہلے ہاف میں میکل اویارزابال نے پنالٹی پر گول کرکے اپنی ٹیم کو برتری دلائی، جبکہ دوسرے ہاف میں پیڈرو پورو نے دانی اولمو کے عمدہ پاس پر دوسرا گول سکور کر کے فرانس کی واپسی کی تمام امیدیں ختم کر دیں۔
کیلیان ایمباپے کی قیادت میں فرانس کو ٹورنامنٹ جیتنے کیلئے فیورٹ قرار دیا جا رہا تھا، تاہم پورے میچ میں سپین کے منظم دفاع اور مؤثر جوابی حملوں کے سامنے فرانسیسی فارورڈز بے بس دکھائی دیے، سپین کے گول کیپر اور دفاعی لائن نے بھی شاندار کھیل پیش کرتے ہوئے فرانس کو کوئی گول کرنے کا موقع نہ دیا۔
اس کامیابی کے ساتھ سپین نے فیفا ورلڈ کپ 2026ء کے فائنل میں اپنی جگہ پکی کر لی ہے، جہاں اس کا مقابلہ انگلینڈ اور ارجنٹینا کے درمیان دوسرے سیمی فائنل کی فاتح ٹیم سے ہوگا، جبکہ فرانس اب تیسری پوزیشن کے میچ میں شرکت کرے گا۔
Comments / رائے دیں
Share your thoughts. Comments are reviewed before they appear publicly.
Approved Comments