شدید دھند: موٹر ویز کو مختلف مقامات پر ٹریفک کیلئے بند کر دیا گیا
لاہور: (دنیا نیوز) شدید دھند کے باعث موٹر ویز کو مختلف مقامات پر ٹریفک کے لیے بند کر دیا گیا۔
ترجمان موٹر وے پولیس سید عمران احمد کے مطابق موٹروے ایم 2 لاہور سے ہرن مینار، موٹروے ایم 5 شیر شاہ ملتان سے ظاہر پیر تک دھند کی وجہ سے بند کر دی گئی ہے۔
عمران احمد نے بتایا کہ شدید دھند کے باعث موٹروے ایم 3 فیض پور لاہور سے درخانہ اور موٹروے ایم 4 پنڈی بھٹیاں سے ملتان تک دھند کی وجہ سے بند کی گئی ہے۔
ترجمان موٹروے پولیس کا کہنا ہے کہ موٹرویز کو عوام کی حفاظت اور محفوظ سفر یقینی بنانے کے لیے بند کیا جاتا ہے، شہری زیادہ سے زیادہ دن کے اوقات پر سفر کرنے کو ترجیح دیں، صبح 10 سے شام 6 بجے تک دھند کے موسم میں بہترین سفری اوقات ہیں۔
سید عمران احمد نے کہا کہ ڈرائیور حضرات گاڑی کے آگے اور پیچھے دھند والی لائٹس کا استعمال کریں، عوام غیر ضروری سفر سے گریز کریں، تیز رفتاری سے پرہیز کر یں اور اگلی گاڑی سے مناسب فاصلہ رکھیں۔
ترجمان موٹروے پولیس کا مزید کہنا تھا کہ ڈرائیور حضرات معلومات اور مدد کے لیے ہیلپ لائن 130 سے رابطہ کریں۔
