چین اور اٹلی کے تعلقات سے ترقی میں مزید تیزی آئیگی، عوام کو فوائد حاصل ہونگے: شی پنگ
بیجنگ: (ویب ڈیسک) اطالوی صدر سرجیو میٹاریلا نے بیجنگ میں چینی صدر شی جن پنگ سے ملاقات کی، جس میں دونوں ملکوں کے مابین دو طرفہ تعلقات پر تفصیلی تبادلہ خیال کیا گیا۔
چینی میڈیا رپورٹ کے مطابق چینی صدر نے گفتگو کرتے ہوئے کہا کہ وہ سات سال بعد اطالوی صدر کے چین کے دوسرے سرکاری دورے کا خیرمقدم کرتے ہیں، یہ سال چین اور اٹلی کے درمیان جامع سٹریٹجک شراکت داری کے قیام کی بیسویں سالگرہ کا سال ہے۔
چینی صدر نے کہاکہ یقین ہے کہ اس دورے سے چین اور اٹلی کے تعلقات کی ترقی میں مزید تیزی آئے گی اور ایک نئے تاریخی نقطہ آغاز پر دونوں ممالک کے عوام کو زیادہ سے زیادہ فوائد حاصل ہوں گے۔
ان کا مزید کہنا تھا کہ اس وقت جب دنیا ایک صدی میں نہ نظر آنے والی بڑی تبدیلیوں سے گزر رہی ہے، چین اور اٹلی کو دو قدیم تہذیبوں کی حیثیت سے کھلے پن اورشمولیت کی اپنی روایت کو آگے بڑھانا چاہئے۔
چینی صدر نے کہا کہ عالمی برادری میں بات چیت کے ذریعے اختلافات کو حل کرنے اور تعاون کے ذریعے تنازعات کو دور کرنے کی ترغیب دینی چاہئے تاکہ ایک ہم آہنگ دنیا کی مشترکہ تعمیر کی جائے۔
صدر شی جن پنگ اور اطالوی صدر سرجیو میٹاریلا نے بیجنگ میں چین اٹلی ثقافتی تعاون میکانزم کی کانفرنس اور چین اور اٹلی کی جامعات کے صدور کے مکالمے میں شرکت کرنے والے دونوں فریقوں کے نمائندوں سے بھی ملاقات کی۔
