مصر، آذربائیجان اور اسرائیل نے بھی غزہ بورڈ آف پیس میں شمولیت کی دعوت قبول کرلی
واشنگٹن: (دنیا نیوز) مصر، آذربائیجان اور اسرائیل نے بھی امریکی صدر ٹرمپ کے بورڈ آف پیس میں شمولیت کی دعوت قبول کرلی۔
اسرائیلی وزیراعظم نیتن یاہو عالمی رہنماؤں پر مشتمل بورڈ آف پیس میں شامل ہوگئے دوسری جانب فرانس، اٹلی، سوئیڈن، ناروے نے بورڈ آف پیس میں شامل ہونے سے انکار کر دیا۔
امریکی نمائندہ خصوصی اسٹیو وٹکوف کا کہنا ہے کہ 20 سے 25 عالمی رہنما غزہ بورڈ آف پیس میں شمولیت کی دعوت قبول کرچکے ہیں، ایران سے بھی رابطہ کیا تھا لیکن اب بات چیت نہیں ہو رہی۔
خبر ایجنسی کے مطابق اراکین کو بورڈ آف پیس میں مستقل طویل مدت کی رکنیت کے لیے 1 ارب ڈالر تک ادائیگی کرنا ہوگی۔
مصری وزارت خارجہ کی جانب سے جاری بیان میں صدر ٹرمپ کی مشرق وسطیٰ کی پالیسیوں کی تعریف کرتے ہوئے کہا گیا ہے کہ مصر بورڈ آف پیس میں شمولیت کی دعوت کو قبول کرنے اور متعلقہ قانونی اور آئینی طریقہ کار کو پورا کرنے کے عزم کا اعلان کرتا ہے۔
آذربائیجان نے بھی امریکا کو بانی رکن بننے کی باضابطہ اطلاع دے دی ہے، آذربائیجان کی وزارت خارجہ کا کہنا ہے کہ عالمی تعاون، امن اور استحکام میں کردار ادا کرنے کیلئے تیار ہیں، آذربائیجان کی رکنیت کی تصدیق کا خط جلد واشنگٹن بھیجا جائے گا۔
دوسری جانب سوئیڈن اور ناروے نے امریکی صدر ٹرمپ کے منصوبے اور بورڈ آف پیس میں شامل نہ ہونے کا فیصلہ کیا ہے، سوئیڈن کا کہنا ہے کہ صدر ٹرمپ کے بورڈ آف پیس کے اقدام میں اب تک پیش کیے گئے مسودے کے ساتھ شرکت نہیں کریں گے۔
ناروےکا بھی کہنا ہے کہ وہ بورڈ آف پیس میں شامل نہیں ہوگا، مجوزہ بورڈ آف پیس کے نکات پر امریکا کے ساتھ مزید بات چیت درکار ہے۔
