ٹرمپ کا ایک اور یوٹرن، برطانوی فوج کی تعریفوں کے پل باندھ دیے
واشنگٹن: (دنیا نیوز) نیٹو کے افغانستان میں کردار پر تنقید کرنے والے امریکی صدر ڈونلڈ ٹرمپ نے اچانک پوزیشن تبدیل کرتے ہوئے برطانوی فوج کی کھل کر تعریف کر دی۔
ٹروتھ سوشل پر جاری پیغام میں امریکی صدر نے کہا کہ برطانیہ کے عظیم اور نہایت بہادر فوجی ہمیشہ امریکا کے ساتھ رہیں گے، افغانستان میں 457 برطانوی فوجی ہلاک اور بہت سے زخمی ہوئے۔
انہوں نے کہا کہ افغانستان میں برطانوی فوجیوں کی قربانی کا جذبہ ناقابل فراموش ہے، امریکا اور برطانیہ کا تعلق مضبوط اور نہ ٹوٹنے والا ہے، امریکی قوم برطانوی فوجیوں سے محبت کرتی ہے اور ہمیشہ کرتی رہے گی۔
خیال رہے کہ امریکی صدر ٹرمپ نے اپنے ایک بیان میں نیٹو کے اتحادی ممالک پر تنقید کرتے ہوئے دعویٰ کیا تھا کہ افغانستان میں طالبان کے خلاف جنگ کے دوران نیٹو کے غیر امریکی فوجی محاذِ جنگ سے کچھ پیچھے رہے اور وہ فرنٹ لائن پر نہیں تھے۔
امریکی صدر کے بیان پر ردعمل دیتے ہوئے برطانیہ کے وزیراعظم سر کیئر سٹارمر نے افغانستان میں برطانیہ سمیت نیٹو کے کردار پر امریکی صدر ٹرمپ کے بیان کو مضحکہ خیز، خطرناک اور توہین آمیز قرار دیتے ہوئے معافی مانگنے کا مطالبہ کیا تھا۔
کنزرویٹو لیڈر کیمی بیڈینوک نے بھی امریکی صدر کے بیان کو’’فضول بکواس‘‘ قرار دیا، جبکہ امریکا میں مقیم برطانیہ کے شہزادے ہیری کا بھی کہنا تھا کہ افغانستان میں دی گئی نیٹو افواج کی قربانیوں کا احترام کیا جانا چاہیے۔
وائٹ ہاؤس نے برطانیہ کے ردعمل کو ملحوظ خاطر نہ رکھتے ہوئے گزشتہ روز بیان جاری کیا تھا کہ جس میں نیٹو سے متعلق بیان پر برطانیہ کی جانب سے امریکا پر کی جانے والی تنقید کو مسترد کیا گیا، بیان میں کہا گیا ہے کہ صدر ٹرمپ درست کہتے ہیں، نیٹو کیلئے امریکا نے سب سے زیادہ قربانیاں دیں، اور دیگر ممالک سے زیادہ کردار ادا کیا۔
