رہنمائے گھر داری:بادام کرے آنکھوں کے سیاہ حلقے دور بالوں کے مسائل کا حل ادرک میں
آنکھوں کے گرد سیاہ حلقے(Dark Circle) ایک عام مسئلہ ہیں جو چہرے کی خوبصورتی پر اثر انداز ہوتے ہیں۔ اس کی کئی وجوہات ہیں مثلاًنیند کی کمی،ذہنی دباؤ یا تھکن، جسم میں موجود وٹامنز کی کمی، جینیاتی مسائل اور پانی کی کمی وغیرہ۔ خواتین سیاہ حلقوں کو ہٹانے کیلئے گھریلو ٹوٹکے آزماتی ہیں۔ آیئے ایسے ہی کچھ ٹوٹکوں کے بارے میں بتاتے ہیں۔
ویسے تو عام طور پر ٹھنڈی چائے کی پٹیاں (خاص طور پر گرین ٹی) آنکھوں پر رکھی جاتی ہیں جن سے سوجن اور حلقے کم ہو جاتے ہیں لیکن کیا آپ جانتی ہیں کہ سیاہ حلقوں سے چھٹکارا بادام کے تیل سے کیا جاسکتا ہے کیونکہ اس تیل میں وٹامن ای پایا جاتا ہے جو جلد کیلئے انتہائی مفید ہے۔ بادام کا تیل ناصرف سیاہ حلقے ختم کرنے میں معاون ہے بلکہ یہ جلد کو جوان بھی رکھتا ہے۔
ٹماٹر کے جوس کا استعمال بھی ان حلقوں سے پیچھا چھڑا سکتا ہے۔ لیموں اور ٹماٹر کے رس کو ہم وزن لیں اور اسے آنکھوں کے نیچے لگائیں، 10 سے 15 منٹ لگے رہنے کے بعد اسے دھوئیں، روز استعمال سے سیاہ حلقے ختم ہونا شروع ہوجائینگے۔
کھیرا یا آلو کے قتلے آنکھوں پر رکھنا فائدہ مند ہوتا ہے۔ عرقِ گلاب سے بھی حلقوں کا خاتمہ ممکن ہے، روئی عرقِ گلاب میں بھگو کر آنکھوں پر رکھیں، فائدہ آپ خود دیکھیں گی۔
ادرک اوربالوں کی نشوونما
ادرک (Ginger) بالوں کی نشوؤنما کیلئے ایک قدرتی اور مؤثر علاج مانا جاتا ہے، خاص طور پر دیسی اور آیورویدک طریقہ علاج میں۔ اس میں موجود جنجرول (Gingerol) اور قدرتی تیل خون کی روانی بہتر بناتے ہیں، جو بالوں کے فولیکلز کو متحرک کرتے ہیں۔
اگر آپ اپنے بالوں کو لمبا کرنا چاہتی ہیں تو ادرک کے تیل کو کیسٹرل آئل کے ساتھ استعمال کریں۔ ہلکے ہاتھ سے مالش کرنے کے بعد 30 منٹ کیلئے سر کی جڑوں میں لگا رہنے دیں اور معمول کے مطابق دھو لیں۔
بالوں کو نرم کرنے کیلئے ضروری ہے کہ آپ 1 چمچ ادرک کے تیل کو 2 چمچ ناریل کے تیل کے ساتھ مکس کریں اور سر پر مساج کریں، تھوڑی دیر رکھنے کے بعد ہلکے گرم پانی سے بالوں کو صاف کرلیں۔
