ارشد ندیم کے شاندار استقبال کیلئے تیاریاں مکمل، ایئر پورٹ پر لوگوں کا جم غفیر
لاہور: (دنیا نیوز) 40 سال بعد پاکستان کو اولمپکس میں گولڈ میڈل جتوانے والے قومی ہیرو ارشد ندیم کے لاہور ایئرپورٹ پر شاندار استقبال کی تیاریاں مکمل کرلی گئیں، ایئرپورٹ پر لوگوں کا جم غفیر موجود ہے۔
قومی ہیرو کے استقبال کے لئے ارشد ندیم کے اہلخانہ اور اہل محلہ سمیت میاں چنوں سے 100 سے زائد افراد پر مشتمل قافلہ لاہور پہنچا ہے جبکہ وزیراعلیٰ مریم نواز کی ہدایت پر ارشد ندیم کے اہلخانہ کو خصوصی پروٹوکول بھی دیا جارہا ہے۔
وفاقی وزرا احسن اقبال، رانا مشہود، شیزا فاطمہ ارشد ندیم کا استقبال کریں گے جبکہ قومی جیولن تھرور یاسر سلطان، قومی ہیرو کے سابق کوچ فیاض بخاری بھی ارشد ندیم کے استقبال کے لیے ایئرپورٹ پر موجود ہیں۔
ایئرپورٹ کے اندر ارشد ندیم کے لیے تقریب کا اہتمام کیا گیا ہے جبکہ حکومت پنجاب کی جانب سے ارشد ندیم کو کل ڈبل ڈیکر بس میں شہر بھر کا چکر بھی لگوایا جائے گا۔
