یوم آزادی: مسلح افواج کا قائداعظمؒ، تحریک پاکستان کے بانی رہنماؤں کو خراج عقیدت پیش
راولپنڈی: (دنیا نیوز) پاکستان کے 79 ویں یوم آزادی پر مسلح افواج نے پوری قوم کو مبارکباد کا پیغام دیا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے قوم کو مبارکباد دی، نیول چیف اور ایئرچیف نے بھی قوم کومبارکباد دی، مسلح افواج نے قائداعظم محمد علی جناحؒ، تحریک پاکستان کے بانی رہنماؤں کو خراج عقیدت پیش کیا۔
آئی ایس پی آر کے مطابق ان کی قربانیوں نے آزادی کے خواب کو خودمختار پاکستان کی حقیقت میں بدل دیا، ان کا وژن، حوصلہ اور عزم آج بھی قوم کیلئے مشعل راہ ہے، یہ ہمیں پاکستان کے اصولوں اور نظریات کے تحفظ کی ترغیب دیتا ہے۔
پاک فوج کے شعبہ تعلقات عامہ نے کہا کہ مسلح افواج اپنے شہداء کی عظیم قربانیوں کو قدر کی نگاہ سے دیکھتی ہیں، سابق فوجیوں اور قانون نافذ کرنے والے اہلکاروں کی خدمات کو خراج تحسین پیش کرتے ہیں، عزم و بہادری سے آزادی، سلامتی اور قومی مفادات کا تحفظ یقینی بنایا۔
آئی ایس پی آر کا کہنا ہے کہ مسلح افواج نے پاکستان کی خودمختاری اور علاقائی سالمیت کے عزم کا اعادہ کیا، مسلح افواج ہر خطرے کیخلاف مادر وطن کا دفاع اور آئین کی پاسداری کریں گی، عوام کی سونپی مقدس ذمہ داری پوری دیانت داری سے نبھائیں گے۔
انہوں نے مزید کہا کہ مسلح افواج امن، استحکام اور قومی ترقی کے لئے کردار ادا کرتی رہیں گی، پاکستان کی اصل طاقت اس کے عوام کے اتحاد اور اجتماعی عزم میں مضمر ہے، یوم آزادی پر ایمان، اتحاد اور نظم و ضبط کے اصولوں سے عہد کی تجدید کریں۔
پاک فوج کے شعبہ تعلقات عامہ کا مزید کہنا ہے کہ قومی یکجہتی، رواداری اور خوشحال کیلئے پاکستان کے لئے مل کر کام کریں، مسلح افواج زندہ باد، پاکستان ہمیشہ پائندہ باد۔
Comments / رائے دیں
Share your thoughts. Comments are reviewed before they appear publicly.
Approved Comments