پی ایس ایل 11 کی ٹیم آف دی ٹورنامنٹ کا اعلان، بابر اعظم کپتان مقرر
لاہور: (دنیا نیوز) پاکستان سپر لیگ (پی ایس ایل) سیزن 11 کی ٹیم آف دی ٹورنامنٹ کا اعلان کر دیا گیا ہے، جس میں ٹائٹل جیتنے والی ٹیم پشاور زلمی کے کپتان بابر اعظم کو شاندار بیٹنگ اور قیادت کے باعث ٹیم کا کپتان مقرر کیا گیا ہے۔
ٹیم آف دی ٹورنامنٹ میں پشاور زلمی اور حیدرآباد کنگز مین کے تین، لاہور قلندرز اور اسلام آباد یونائیٹڈ کے دو، دو جبکہ ملتان سلطانز اور کوئٹہ گلیڈی ایٹرز کا ایک، ایک کھلاڑی شامل کیا گیا ہے۔
ٹیم کا انتخاب معروف کمنٹری پینل کے پانچ رکنی جیوری نے کیا جبکہ ابھرتے ہوئے کھلاڑیوں پر مشتمل ایک الگ ایمرجنگ ٹیم بھی منتخب کی گئی۔
پی ایس ایل 11 کے میچز 26 مارچ سے 3 مئی تک لاہور اور کراچی میں کھیلے گئے، جن میں مجموعی طور پر 44 مقابلے ہوئے۔
— PakistanSuperLeague (@thePSLt20) May 4, 2026
بابر اعظم نے بطور اوپنر کھیلتے ہوئے 588 رنز بنا کر حنیف محمد کیپ اپنے نام کی اور ٹورنامنٹ کے ٹاپ اسکورر رہے، انہوں نے ایک سیزن میں سب سے زیادہ رنز بنانے کا ریکارڈ بھی فخر زمان کے 2022 کے کارنامے کے برابر کر دیا، بابر نے کوئٹہ گلیڈی ایٹرز اور اسلام آباد یونائیٹڈ کے خلاف دو سنچریاں بھی اسکور کیں۔
پشاور زلمی کے دیگر کھلاڑیوں میں کوشل مینڈس اور صوفیان مقیم بھی ٹیم میں شامل ہیں، مینڈس نے 550 رنز سکور کیے اور بطور وکٹ کیپر 8 شکار بھی کیے جبکہ صفیان مقیم نے 22 وکٹیں لے کر پلیئر آف دی ٹورنامنٹ اور بہترین باؤلر کا اعزاز حاصل کیا۔
حیدرآباد کنگز مین کی جانب سے عثمان خان، حسن خان اور ایمرجنگ پلیئر حنین شاہ ٹیم کا حصہ بنے، لاہور قلندرز کے فخر زمان اور شاہین شاہ آفریدی نے بھی شاندار کارکردگی کے باعث جگہ بنائی۔
ملتان سلطانز کے شان مسعود 367 رنز کے ساتھ ٹیم میں شامل کیے گئے جبکہ اسلام آباد یونائیٹڈ کے کپتان شاداب خان نے آل راؤنڈ کارکردگی کے باعث ٹیم میں جگہ بنائی، ان کے ساتھ رچرڈ گلیسن بھی شامل ہیں۔
— PakistanSuperLeague (@thePSLt20) May 4, 2026
کوئٹہ گلیڈی ایٹرز کے حسن نواز کو 12ویں کھلاڑی کے طور پر منتخب کیا گیا، جنہوں نے 291 رنز اسکور کیے، یہ ٹیم پی ایس ایل 11 میں نمایاں کارکردگی دکھانے والے کھلاڑیوں کا بہترین مجموعہ قرار دی جا رہی ہے۔
