گوشوارے جمع کرانے تک 24سابق ارکان اسمبلی الیکشن کیلئے نااہل
اسلام آباد(این این آئی)الیکشن کمیشن نے24 سابق ارکان قومی و صوبائی اسمبلی کو نااہل قرار دے دیا، مالی سال 2022-23 کے اثاثوں اور گوشواروں کی تفصیلات جمع نہ کرانے کے معاملے پر الیکشن کمیشن نے قومی اسمبلی کے 10 اور سندھ و بلوچستان اسمبلیوں کے 7، 7 سابق ارکان کو نااہل قرار دیا ہے۔
الیکشن کمیشن نے اثاثوں کی تفصیلات جمع نہ کرانے سے متعلق کیس کا فیصلہ جاری کر دیا۔ فیصلے کے مطابق سابق ارکان قومی اور صوبائی اسمبلی تفصیلات جمع کرانے تک عام انتخابات، ضمنی انتخابات اور سینیٹ الیکشن میں حصہ نہیں لے سکیں گے ، مالی سال 2022-23ئکے اثاثوں کی تفصیلات کا فارم بی جمع کرانے تک یہ ارکان نااہل رہیں گے ۔ الیکشن کمیشن نے تحلیل قومی اسمبلی کے سابق ارکان خرم دستگیر خان، محسن نواز رانجھا ، محمد عادل ، رانا اسحاق خان، کمال الدین، عصمت اللہ، ثمینہ مطلوب، نصیبہ ، شمیم آرا پنور اور روبینہ عرفان کو نااہل قرار دیا۔تحلیل صوبائی اسمبلی سندھ کے سابق رکن عدیل احمد ، حزب اللہ بھگیو، ارسلان تاج حسین، عارف مصطفی جتوئی، عمران علی شاہ، علی غلام اور طاہرہ کو بھی نااہل قرار دیا گیا ۔الیکشن کمیشن نے بلوچستان اسمبلی کے سابق رکن میر سکندر علی، میر محمد اکبر، سردار یار محمد رند، عبدالرشید عبدالواحد صدیقی، میر حمال اور بی بی شاہینہ کو بھی نااہل قرار دیا ہے ۔
