مانگ ٹیکا: زیور کا اہم جزو، عام تقریبات میں بھی حسن کو چار چاند لگائے
اگر کہا جائے کہ دلہن کی تیاری مانگ ٹیکا کے بغیر نا مکمل ہے تو غلط نہ ہو گا۔ عام طور پر دلہنیں بارات کے دن کیلئے مانگ ٹیکے کا انتخاب کرتی ہیں، تاہم اب مانگ ٹیکا دلہن کی جیولری کے علاوہ بہنوں اور کزنز کی جیولری کا بھی لازمی جزو نظر آتا ہے جبکہ دلہنیں بارات کیلئے زیادہ تر ماتھا پٹی کا استعمال کرتی ہیں اور ولیمہ کیلئے مانگ ٹیکے کا انتخاب کرتی ہیں۔
فیشن کے بدلتے مزاج اور انداز کے ساتھ اب یہ صرف شادی کے دن تک ہی مخصوص نہیں رہ گیا۔ اب تو یہ عام تقریبات میں لان اور کاٹن کے سادہ ملبوسات کے ساتھ بھی لڑکیاں لگا سکتی ہیں۔ مناسب لباس کے ساتھ دلفریب زیور کا انتخاب ہر موسم میں رنگ و روپ کی بہار لے آتا ہے۔
مانگ ٹیکا کا روایتی انداز آج جدت کے ساتھ ڈیزائن کیا جاتا ہے۔ ان میں کندن مانگ ٹیکا، چاند مانگ ٹیکا اور رنگین موتی اور نگینے سے سجا مانگ ٹیکا سب سے خاص ہے۔
اگر آج کل کے مقبول ڈیزائنز کی عام تقریبات میں استعمال کی بات کی جائے تو مغل مانگ ٹیکا مغلیہ زیورات کی شان لیے نفاست سے بھرپور انتخاب ہے۔ کشادہ پیشانی کیلئے یہ ڈیزائن بہترین ہے۔ یہ دیکھنے میں کسی چھوٹی طشتری جیسا نظر آتا ہے۔ اس کا ڈیزائن بھاری بھرکم مگر اس پر کی گئی ڈیزائننگ نفیس اور باریک ہوتی ہے۔ گول چہرے پر اس کی سج دھج دیکھنے سے تعلق رکھتی ہے۔
چاند مانگ ٹیکا کا اپنا ایک منفرد شاندار انداز ہے۔ چاند ڈیزائن پر مبنی اس مانگ ٹیکے کو چاند بالی کی طرح مقبولیت حاصل ہو رہی ہے اور شادی بیاہ کے موقع پر اسے خاص طور پر اپنایا جاتا ہے۔ اس کے علاوہ ہلال مانگ ٹیکا بھی کشادہ پیشانی پر چودھویں کے چاند سا دکھائی دیتا ہے۔ اسے ماتھے پہ سجا کے یوں محسوس ہوتا ہے گویا آسمان کی بہار زمین پر اتر آئی ہو۔ کندن کے زیورات ہمیشہ فیشن میں ان رہتے ہیں۔ کندن کے مانگ ٹیکے کو چہرے کی مناسبت سے باآسانی اپنایا جا سکتا ہے۔ یہ روایتی سفید اور سنہری رنگ میں تیار کیے جاتے ہیں اور ان میں چمک دمک کے بجائے سادگی نمایاں ہوتی ہے۔
ان تمام مانگ ٹیکوں کی سج دھج اپنی جگہ ، لیکن اگر آپ فیشن میں نازکی کی قائل ہیں تو نازک سا لاکٹ مانگ ٹیکا جو ایک لڑی پر مشتمل ہو آپ کی انفرادیت کو ظاہر کرنے کیلئے بہترین ہے۔ یہ نازک سا مانگ ٹیکا سونے سے تیار کیا گیا ہو یا موتی اور نگینے سے اس کی نفیس نازکی اس کی خوبصورتی کو ظاہر کرتی ہے۔
ان دنوں ون سائیڈڈ مانگ ٹیکا بھی فیشن میں خاصا مقبول ہے۔ مانگ ٹیکے کا یہ انداز زیورات میں ایک نیا اضافہ ہے۔ یہ تین لڑیوں سے جڑا ایک خوبصورت انداز ہے۔
