حکومت کی یو اے ای سے 3 ارب ڈالر قرض رول اوور کرنے کی درخواست
اسلام آباد: (مدثر علی رانا) حکومت نے متحدہ عرب امارات (یو اے ای) سے 3 ارب ڈالر کے قرض کی میچورٹی سے قبل رول اوور کیلئے باضابطہ درخواست دے دی۔
ذرائع وزارتِ خزانہ کے مطابق وزیراعظم شہباز شریف نے خط کے ذریعے یو اے ای قیادت سے 3 ارب ڈالر کے قرض کو رول اوور کرنے کی درخواست کی ہے، 2 ارب ڈالر کی میچورٹی رواں ماہ جبکہ 1 ارب ڈالر کی میچورٹی جولائی میں ہے۔
ذرائع کے مطابق یو اے ای سے حاصل کردہ 3 ارب ڈالر 2021 میں سٹیٹ بینک آف پاکستان میں ڈیپازٹ کرائے گئے تھے، 1 ارب ڈالر کا قرض جنوری کے دوسرے ہفتے جبکہ ایک ارب ڈالر کی ایک اور قسط جنوری کے تیسرے ہفتے میں میچور ہو جائے گی۔
وزارت خزانہ کے ذرائع کے مطابق حکومت کی جانب سے 3 ارب ڈالر کی تینوں اقساط کو میچورٹی سے قبل رول اوور کرنے کی درخواست دی جا رہی ہے اور توقع ہے کہ تینوں اقساط بروقت رول اوور ہو جائیں گی۔
ذرائع کے مطابق آئی ایم ایف کو قرض پروگرام کے دورانیے تک یو اے ای سے رول اوور کی یقین دہانی کرائی گئی ہے، رواں مالی سال یو اے ای، سعودی عرب اور چین سے مجموعی طور پر 12 ارب ڈالر کے قرض رول اوور کئے جائیں گے۔
