قومی اسمبلی میں مطالبات زر کی منظوری کا عمل مکمل، فنانس بل 28جون کو منظور ہوگا
اسلام آباد:(دنیانیوز) قومی اسمبلی میں مطالبات زر کی منظوری کا عمل مکمل جبکہ ایوان میں وفاقی بجٹ اور فنانس بل کل منظور کیا جائے گا۔
سپیکر ایاز صادق کی زیر صدارت آج بھی بجٹ سے متعلق اجلاس ہوا جس میں 40 وزارتوں، ڈویژنز اور اداروں کے 8883 ارب روپے سے زائد مالیت کے 133 مطالبات زر منظور کیے گئے۔
اپوزیشن کی جانب سے سات وزارتوں اور ڈویژنوں کے مطالبات زر کی تمام تحاریک و تجاویز کو مسترد کردیا گیا جبکہ قانون و انصاف ڈویژن کے 15 ارب 62 کروڑ روپے سے زائد کے تین مطالبات زر منظور ہوئے۔
قومی اسمبلی نے دو روز کے دوران 6165 ارب روپے سے زائد کے 103 مطالبات زر کٹوتی کی تحاریک کے بغیر منظور کیے جبکہ سات وزارتوں و ڈویژنوں کے 2860 ارب روپے سے زائد کے 30 مطالبات زر پر کٹوتی کی تحاریک مسترد کی گئیں۔
ایوان نے خارجہ امور ڈویژن کے 51 ارب 86 کروڑ روپے سے زائد کے دو مطالبات زر پر اپوزیشن کی کٹوتی کی 27 تحاریک، وزارت داخلہ کے 56 ارب 63 کروڑ 73 لاکھ روپے سے زائد کے پانچ مطالبات زر پر کٹوتی کی 107 تحاریک مسترد کیں۔
اسلام آباد کیپیٹل ٹیریٹری کے لیے 20 ارب 41 کروڑ روپے، نیشنل کاؤنٹر ٹیررازم اتھارٹی کے لیے ایک ارب روپے سے زائد کا مطالبہ زر منظور کیا گیا، غذائی تحفظ ڈویژن کے دو مطالبات زر پر اپوزیشن کی 46 کٹوتی کی تحاریک مسترد کرتے ہوئے ایوان نے 21 ارب 19 کروڑ روپے سے زائد مالیت کے مطالبات منظور کیے۔
وزارت دفاع کے 2149 ارب 82 کروڑ روپے، انٹیلی جنس بیورو کیلئے 18 ارب 32 کروڑ روپے، دفاعی پیداوار ڈویژن کے 4 ارب 87 کروڑ، بے نظیر انکم سپورٹ پروگرام 598 ارب 71 کروڑ روپے، آبی وسائل ڈویژن کے 263 ارب 48 کروڑ روپے، اقتصادی امور ڈویژن کے 30 ارب 68 کروڑ روپے، وفاقی تعلیم ڈویژن کے 198 ارب 55 کروڑ 26 لاکھ روپے سے زائد کے مطالبات زر منظور کیے گئے۔
وزارت قومی صحت کے 54 ارب 86 کروڑ روپے، ریلوے ڈویژن کے 109 ارب 43 کروڑ روپے، اسلام آباد کی ضلعی عدالتوں کے لیے ایک ارب 36 کروڑ روپے، ہوا بازی ڈویژن کے 26 ارب 17 کروڑ، موسمیاتی تبدیلی کے 7 ارب 26 کروڑ سے زائد کے مطالبات زر منظور کیے گئے۔
وزارت تجارت کے 22 ارب 73 کروڑ، مواصلات ڈویژن کے 65 ارب 31 کروڑ، انفارمیشن ٹیکنالوجی ڈویژن کے 69 ارب 5 کروڑ، ہاؤسنگ و تعمیرات ڈویژن کے 36 ارب 74 کروڑ روپے سے زائد کے مطالبات زر منظور کیے گئے۔
اطلاعات و نشریات ڈویژن کے 17 ارب 91 کروڑ روپے، بحری امور ڈویژن کے 7 ارب 45 کروڑ روپے، انسداد منشیات ڈویژن کے 7 ارب 77 کروڑ روپے، منصوبہ بندی اور ترقی ڈویژن کے 73 ارب 45 کروڑ روپے سے زائد کے مطالبات زر منظور کیے گئے۔
دوسری جانب مطالبات زر منظور ہونے کے بعد قومی اسمبلی کا اجلاس کل صبح 11 بجے تک ملتوی کردیا گیا ہے۔
