سکھ شہری کے قتل کی سازش پر امریکا کی بھارت سے جواب دہی
واشنگٹن: (دنیا نیوز) امریکی سرزمین پر سکھ شہری کے قتل کی سازش کرنے پر امریکا نے بھارت سے جواب دہی شروع کر دی۔
امریکا کے نائب وزیر خارجہ کرٹ کیمبل نے ایک بیان میں کہا ہے کہ امریکی سرزمین پر ایک امریکی شہری کے قتل کی کوشش کی گئی، سازش میں بھارت کے ملوث ہونے کی تحقیقات پر پوچھ گچھ کی جا رہی ہے۔
کرٹ کیمبل نے مزید کہا ہے کہ امریکا نے بھارت پر واضح کیا ہے کہ وہ قتل کی سازش کے معاملے میں جواب دہی چاہتا ہے، ہم نے یہ بھی کہا ہے کہ معاملے پر پیشرفت سے بھی آگاہ کیا جائے، بھارت کی جانب سے امریکی تحفظات کا جواب بھی دیا گیا ہے۔
نائب امریکی وزیر خارجہ کرٹ کیمبل نے کہا ہے کہ بھارتی حکام الزامات کی روشنی میں ادارہ جاتی اصلاحات کی ضرورت پر غور کر رہے ہیں۔
