پنجاب میں دھند کا راج، حد نگاہ صفر، موٹر ویز بند، سردی کی شدت میں اضافہ
لاہور: (دنیا نیوز) لاہور سمیت پنجاب بھر میں دھند کا راج برقرار ہے، شدید دھند کی وجہ سے حد نگاہ صفر ہو گئی جس کے باعث موٹر ویز کو بھی متعدد مقامات سے بند کر دیا گیا۔
ترجمان موٹر وے پولیس سید عمران احمد نے بتایا کہ موٹروے ایم 2 لاہور سے کوٹ مومن دھند کی وجہ سے بند کردی گئی، عبد الحکیم موٹروے ایم 3 بھی دھند کی وجہ سے بند کی گئی، ایم 4 پنڈی بھٹیاں سے عبد الحکیم دھند کی وجہ سے بند کردی گئی۔
ترجمان نے مزید بتایا کہ موٹروے ایم 5 شیر شاہ رحیم یارخان سے روہڑی تک دھند کی وجہ سے بند کی گئی، لاہور سیالکوٹ موٹروے ایم 11کو بھی دھند کی وجہ سے بند کیا گیا۔
گوجرانوالہ شہر اور گردونواح میں شدید دھند کا راج برقرار رہنے کی وجہ سے حد نگاہ صفر ہو گئی، دھند کے باعث موٹر وے کو بند کردیا گیا، ٹریفک کی روانی شدید متاثر ہوگئی، سردی کی شدت میں بھی اضافہ ہو گیا۔
ٹریفک پولیس کے مطابق شہری بلا ضرورت سفر سے گریز کریں، ڈرائیورز فوگ لائٹس کے استعمال کو یقینی بنائیں۔
