لزبن میں کیبل کار کو حادثہ، 15 افراد جان سے گئے، 18 زخمی
لزبن: (دنیا نیوز) لزبن میں پرانی کیبل کار حادثے کا شکار ہوگئی، 15 افراد جان سے گئے جبکہ 18 زخمی بھی ہوئے، 5 کی حالت تشویشناک بتائی گئی ہے۔
حادثہ مقامی وقت کے مطابق شام 6 بج کر 5 منٹ پر ایوینیڈا دا لیبرداد کے قریب پیش آیا، حکام کے مطابق حادثے کے وقت گاڑی میں کتنے افراد سوار تھے اس کی تصدیق نہیں ہو سکی، ابتدائی اطلاعات کے مطابق ٹریک پر نصب کیبل اچانک ٹوٹ گئی، جس سے گاڑی بے قابو ہو کر قریبی عمارت سے جا ٹکرائی۔
ریسکیو ٹیموں نے فوری طور پر کارروائی کرتے ہوئے پھنسے ہوئے تمام افراد کو نکال لیا، جائے حادثہ پر 62 ایمرجنسی اہلکار اور 22 گاڑیاں موجود تھیں۔
لزبن کے میئر کارلوس موئیداس نے اس سانحے کو شہر کے لیے ایک المناک لمحہ قرار دیا، جبکہ پرتگالی صدر مارسيلو ریبیلو دی سوزا اور یورپی کمیشن کی صدر ارسلا وان ڈیر لائن نے جاں بحق افراد کے لواحقین سے اظہار تعزیت کیا۔
واضح رہے کہ فنیکیولر ٹرین سسٹم لزبن کا ایک تاریخی اور سیاحتی ورثہ ہے، جو 1885ء سے چل رہا ہے اور شہر کی پہاڑی گلیوں میں آمدورفت کا اہم ذریعہ سمجھا جاتا ہے۔
