انڈونیشیا میں شدید بارشوں کے بعد سیلاب، 14 افراد ہلاک، 18 زخمی
جکارتہ: (دنیا نیوز) انڈونیشیا کے صوبہ شمالی سولاویسی میں شدید بارشوں کے بعد سیلاب کی صورتحال پیدا ہو گئی، سیلابی ریلے میں بہہ کر 14 افراد ہلاک، 18 زخمی اور 4 لاپتا ہوگئے۔
گورنر شمالی سولاویسی کے مطابق سیلاب سے سیکڑوں مکانات اور سرکاری عمارتیں بھی تباہ ہوگئیں، شدید بارشوں کے بعد سیلابی صورتحال برقرار ہے۔
انہوں نے کہا کہ مختلف حادثات میں لاپتہ افراد کی تلاش کا کام جاری ہے، اب تک 444 افراد کو محفوظ مقامات پر منتقل کردیا گیا ہے۔
گورنر شمالی سولاویسی نے کہا کہ سیلاب سے متاثرہ علاقوں میں امدادی کارروائیاں جاری ہیں۔
محکمہ موسمیات کے مطابق جنوری اور فروری میں ملک کے کئی جزائر میں مزید بارشوں اور سیلاب کا خطرہ ہے، خصوصاً جاوا، سولاویسی، مالوکو اور پاپوا شدید متاثر ہونگے۔
