کسانوں کیلئے آج شاندار پیکیج لانے کا اعلان،آٹا مہنگا ہوگا نہ کسان کو نقصان:مریم نواز
لاہور (سٹاف رپورٹر )وزیراعلیٰ پنجاب مریم نوازکی زیر صدارت کسان پیکیج سے متعلق خصوصی اجلاس ہوا جس میں اہم فیصلے کیے گئے ۔
وزیراعلیٰ نے اجلاس میں کہا کہ کسان کا نقصان نہ ہونے اور مفادات کے تحفظ کے وعدے کی تکمیل کے لئے گندم کٹائی کے موقع پراپنا وعدہ پورا کرتے ہوئے شاندار کسان پیکیج کااعلان آج بدھ کیا جائے گا۔ گندم کے کاشتکاروں کے لئے یہ پیکیج پنجاب کی تاریخ کا منفرد،بہترین اور بے مثال ثابت ہوگا اس سے کاشتکاروں کو محنت کا پورا معاوضہ ملے گا۔ایسے اقدامات کرینگے آٹا بھی مہنگا نہ ہو اور کسان کو بھی نقصان نہ ہو۔ وزیراعلیٰ نے کہا کہ کسان بھائیوں نے شب وروز محنت کرکے میری اپیل پر ریکارڈ گندم کاشت کی۔ کسان کی کاوشوں سے پنجاب نے گندم کی کاشت کا ہدف پورا کیا ۔ کسان کے ساتھ ساتھ عام آدمی کے مفادات کا تحفظ بھی کرینگے ۔مریم نواز سے اکنامک کارپوریشن آرگنائزیشن کے 25 رکنی وفد نے ملاقات کی۔ وفد میں تاجکستان، ازبکستان، ترکیہ، قازقستان، ترکمانستان، ایران، آذربائیجان اور پاکستان کے ای سی او میں مستقل مندوب شامل تھے ۔مریم نواز نے لاہور آمد پر وفدکا پرتپاک خیر مقدم کیااور لاہور کو ای سی او کیپٹل قرار دینے میں معاونت پر ترکمانستان کا شکریہ ادا کیا۔ وزیراعلیٰ نے وفد سے گفتگو کرتے کہا کہ ای سی او کے معزز مہمانوں کی موجودگی ہمارے لیے باعثِ اعزاز ہے ۔
باقی شہر بھی اچھے لگتے ہیں مگر قدیم اور جدید ثقافت کے شہر لاہور سے محبت ہے ۔ نواز شریف اپنی ذاتی نگرانی میں لاہور کی ثقافتی بحالی کے لئے کوشاں ہیں۔ لاہور صرف ایک شہر نہیں بلکہ زندہ تاریخ کا میوزیم ہے ۔لاہور کی گلیوں میں تہذیب کی خوشبو ہے ، آثارقدیمہ ماضی کی عظمت کے گواہ ہیں۔ لاہور کے لوگ پیار اور محبت کے پیکر ہیں،لاہوریوں کی میزبانی بے مثال ہے ۔ لاہور کے باغات شاہی قلعے اور یونیسکو ورلڈ ہیریٹیج سائٹس اسکی شان و شوکت کا ثبوت ہیں۔لاہور نا صرف تاریخ کا محافظ ہے بلکہ ذائقوں کا مرکز بھی ہے ۔پنجاب سیاحوں کی میزبانی کے لیے مکمل طور پر تیار ہے ۔پنجاب حکومت نا صرف لاہور بلکہ پورے صوبے میں سیاحتی مقامات کو اپ گریڈ کر رہی ہے ۔ ملکی و غیر ملکی سیاحوں کو ہر ممکن سہولت فراہم کی جا رہی ہے ۔ پنجاب کاروبار، ٹیکنالوجی اور سروسز کا ابھرتا ہوا مرکز بنتا جا رہا ہے ۔ یہاں زراعت، ٹیکنالوجی، ٹورازم، تعلیم اور انڈسٹری اور دیگر شعبوں میں بے پناہ مواقع موجود ہیں۔وفد کے شرکا نے کہا لاہور آکر خوشی ہوئی،شہر بے مثال ہے ،شاندار استقبال نہیں بھول سکتے ۔
