آئی جی پنجاب کا تمام خط و کتابت پیپر لیس کرنے کا حکم
لاہور(کرائم رپوٹر)پنجاب پولیس نے ای پولیسنگ و خط و کتابت کیلئے تمام اداروں و اضلاع کی پولیس فورس کو پیپر لیس ورکنگ پر منتقل کردیا۔
آئی جی نے 15 روز بعد تمام خط وکتابت پیپر لیس کرنے کا حکم دیتے ہوئے فزیکل ڈاک موصول کرنے سے روک دیا۔پنجاب پولیس کو پیپر لیس ورکنگ پر منتقل کردیا گیا، اے آئی جی ایڈمن اینڈ سکیورٹی نے احکامات پر عملدرآمد کیلئے مراسلہ جاری کردیا جس میں کہا گیا ہے کہ آئندہ سے تمام ضلعی و یونٹس سے سی پی او خط وکتابت آن لائن کی جائے گی اور پولیس سربراہان آن لائن و پیپر لیس خط وکتابت کو یقینی بنائیں گے ۔اس مقصد کیلئے پنجاب پولیس کے تمام اداروں و اضلاع کے لاگ اِن بنا دئیے گئے ہیں اور متعلقہ سٹاف کو پیپر لیس ورکنگ کے حوالے سے تربیت بھی دے دی ہے ۔پولیس حکام کے مطابق پیپر لیس ورکنگ سے پرائیویسی اور سیکریسی مزید بہتر ہوگی اور سالانہ سٹیشنری کی مد میں کروڑوں روپے کی بچت ہوگی۔پولیس کا کہنا ہے کہ جس افسر کے نام پر ڈاک آئے گی صرف وہی اسے اوپن کرکے دیکھ سکے گا جس سے سیکریسی بھی بہتر ہوگی۔آئی جی نے متعلقہ حکام کو 15 روز کے بعد فزیکل ڈاک موصول کرنے سے منع کردیا ۔
