کارکردگی اہداف،ملتان کی نمایاں پوزیشن
ملتان (وقائع نگار خصوصی،لیڈی رپورٹر) وزیر اعلیٰ پنجاب کی جانب سے جاری کردہ کارکردگی اہداف میں ملتان ڈویژن نے نمایاں پوزیشن حاصل کی ہے ۔۔۔
گزشتہ تین ماہ کی کارکردگی جانچنے کے بعد ملتان ڈویژن کے اضلاع کو شاندار نتائج پر اعلیٰ درجہ بندی دی گئی۔کارکردگی انڈیکیٹرز کی بنیاد پر تیسرے گروپ میں شامل چودہ اضلاع میں ضلع لودھراں نے پہلی پوزیشن حاصل کی، جبکہ دوسرے گروپ میں شامل اٹھارہ اضلاع میں ضلع خانیوال نے دوسری اور ضلع وہاڑی نے تیسری پوزیشن حاصل کی۔ اسی طرح، پہلے گروپ میں شامل چھ بڑے اضلاع میں ضلع ملتان نے تیسری پوزیشن حاصل کی۔اضلاع کی درجہ بندی آبادی اور حجم کے اعتبار سے مختلف گروپس میں کی گئی تھی تاکہ کارکردگی کا منصفانہ تجزیہ کیا جا سکے ۔ اس شاندار کامیابی پر کمشنر ملتان عامر کریم خاں نے ڈویژن کے تمام ڈپٹی کمشنرز اور ان کی ٹیموں کو مبارکباد دی اور ان کی محنت و کارکردگی کو سراہا۔علاوہ ازیں کمشنر ملتان عامر کریم خاں نے مرکزی عید گاہ میں عید کی نماز ادا کی اور بعد ازاں کارڈیالوجی ہسپتال کا دورہ کیا، جہاں انہوں نے زیر علاج مریضوں میں تحائف اور عیدی تقسیم کی۔ اس موقع پر انہوں نے کہا کہ عید کی خوشیوں میں سب کو شریک کرنا ہمارا اجتماعی فریضہ ہے ۔کمشنر عامر کریم خاں نے چلڈرن ہسپتال کا بھی دورہ کیا، جہاں انہوں نے بیمار بچوں کی عیادت کی اور ان میں عیدی و تحائف تقسیم کئے ۔ انہوں نے والدین سے ملاقات کے دوران بچوں کی جلد صحت یابی کے لئے نیک تمناؤں کا اظہار کیا اور ڈاکٹرز و ہسپتال عملے سے بھی ملاقات کی۔ ان کا کہنا تھا کہ بیمار بچوں کے چہروں پر مسکراہٹ لانا حقیقی خوشی اور معاشرتی یکجہتی کی خوبصورت مثال ہے ۔کمشنر عامر کریم خاں نے ویسٹ مینجمنٹ کمپنی کے ڈویژنل کنٹرول روم کا بھی اچانک دورہ کیا اور ڈویژن کی 14 تحصیلوں میں جاری صفائی آپریشن کا جائزہ لیا۔ انہوں نے کہا کہ وزیر اعلیٰ پنجاب کی ہدایت پر ڈویژن بھر میں میگا صفائی آپریشن کیا گیا، جس کے تحت 9694 ورکرز اور 2356 مشینری کی مدد سے کوڑا اٹھایا گیا۔
