وزرا کی قومی اسمبلی اجلاس میں عدم شرکت، ڈپٹی سپیکر کا وزیرا عظم کو خط
اسلام آباد(سٹاف رپورٹر)قومی اسمبلی اجلاس میں وزرا اور وزرامملکت کے نہ آنے پر ڈپٹی سپیکر سید غلام مصطفی شاہ نے وزیراعظم شہباز شریف، وفاقی وزیر پارلیمانی امور طارق فضل چودھری کو خط لکھ دیا۔
خط کے متن میں غلام مصطفی شاہ نے لکھا کہ قومی اسمبلی کے وقفہ سوالات کے دوران وزراء کی عدم موجودگی تشویش ناک مسئلہ ہے ،خط میں انہوں نے بعض وزارتوں کے وزراء اور پارلیمانی سیکرٹریز کے اسمبلی کی کارروائی سے غائب رہنے کا حوالہ بھی دیا۔انہوں نے لکھا کہ وزراء اور پارلیمانی سیکرٹریز کی غیر موجودگی پارلیمانی روایات کی کھلی خلاف ورزی ہے ، لہذا وزراء کی غیر موجودگی کے معاملہ کو فوری حل کیا جائے ۔خط میں انہوں نے کہا کہ قومی وسائل کے استعمال کے باوجود وزراء کی عدم دلچسپی سے ایوان کی کارروائی کا مقصد پورا نہیں ہو سکتا، آئین کے تحت اراکین کے سوالات کے جواب دینا کابینہ کی مجموعی ذمہ داری ہے ، انہوں نے وزیراعظم سے مطالبہ کیا کہ مسئلے کو فوری حل کیا جائے ۔
