پی ایس ایل 10 کا رنگارنگ افتتاحی تقریب سے شاندار آغاز
راولپنڈی (سپورٹس رپورٹر)ایچ بی ایل پاکستان سپر لیگ کے 10ویں ایڈیشن کا رنگا رنگ افتتاحی تقریب سے راولپنڈی کرکٹ سٹیڈیم میں شاندار آغازہوگیا ۔۔
تقریب کا آغاز فلائنگ مین کے جیٹ پروپلژن کے مظاہرے کے ساتھ کیا گیا۔جیٹ پروپلژن کا مظاہری کرنے والے فلائنگ مین نے پی ایس ایل 10 کی ٹرافی سی ای او پی ایس ایل سلمان نصیر کے سپرد کی جنہوں نے اس کو سٹیج پر سجایا۔بعدازاں سرتال اکیڈمی کے بچوں نے قومی ترانہ پیش کیا۔افتتاحی تقریب میں میزبانی کے فرائض نامور پریزنٹر زینب عباس نے انجام دیئے ، ترانے کے بعد اداکار حمزہ علی عباسی نے سٹیج پر گفتگو کی جس کے بعد معروف صوفی گلوکارہ عابدہ پروین نے اپنے فن کا مظاہرہ کیا۔بعد ازاں تقریب میں شریک لوگ ینگ اسٹنرز کی پرفارمنس سے محظوظ ہوئے ۔ جس کے بعد مشہور پاپ گلوکار علی ظفر نے شاندار پرفارمنس پیش کرتے ہوئے ملک کی ثقافتوں کی نمائندگی کرتے ہوئے اپنے سندھی، پنجابی، بلوچی اور پشتو میں گانے پیش کئے ،بعد ازاں علی ظفر، نتاشہ بیگ، ابرار الحق اور طلحہ انجم نے پاکستان سپر لیگ 10کا اینتھم پیش کیا۔تقریب میں شاندار آتش بازی کا مظاہرہ بھی کیا گیا۔اس موقع پر شہریوں کی بہت بڑی تعداد سٹیڈیم میں موجود تھی۔
