پولٹری کے بیوپاری سے 25 لاکھ چھین لیے گئے ، مزاحمت پر گارڈ زخمی
کراچی(اسٹاف رپورٹر،مانیٹرنگ ڈیسک) عید الفطرقریب آتے ہی شہر میں اسٹریٹ کرائم اور ڈکیتی کی وارداتوں میں اضافہ ہوگیا۔۔
کورنگی میں پولٹری کا کاروبار کرنے والے شہری سے مسلح ڈکیتوں نے اسلحے کے زور پر 25 لاکھ روپے چھین لیے اور مزاحمت پر فائرنگ کرتے ہوئے فرار ہو گئے ،مسلح ڈکیتوں کی فائرنگ سے متاثرہ شہری کا سکیورٹی گارڈ سر پر گولی لگنے سے شدید زخمی ہو گیا جسے تشویشناک حالت میں جناح اسپتال منتقل کردیا گیا۔کورنگی تھانے کے علاقے کورنگی نمبر ڈیڑھ مٹکے والی پلیہ کے قریب گاڑی میں سوار نامعلوم مسلح ملزمان اسلحے کے زور پر گاڑی میں سوار پولٹری کا کاروبار کرنے والے شہری سے 25 لاکھ روپے چھین لیے اور مزاحمت پر فائرنگ کرتے ہوئے فرارہوگئے ۔مسلح ڈکیتوں کی فائرنگ سے شہری کی گاڑی کی پچھلی نشست پر بیٹھا سکیورٹی گارڈ شدید زخمی ہوگیا جسے فوری طور پر چھیپا ایمبولنس کے ذریعے جناح اسپتال منتقل کردیا جہاں زخمی سکیورٹی گارڈ کی حالت تشویشناک بتائی جارہی ہے ۔واقعے کی اطلاع ملنے پرایس ایس پی کورنگی اوردیگرپولیس افسران بھی موقع پرپہنچ گئے اور پولیس نے فوری کرائم سین یونٹ کوبھی موقع پرطلب کرلیا گیا، زخمی سکیورٹی گارڈ کی شناخت 35 سالہ امیر احمد کے نام سے کی گئی۔ایس ایس پی کورنگی طارق نواز نے بتایا کہ پولٹری فارم کا کاروبار کرنے والا شہری فرحان گاڑی میں اپنے دوست بشیراورسکیورٹی گارڈ کے ہمراہ گھرسے 25 لاکھ روپے بینک میں جمع کرانے جا رہا تھا کہ کورنگی نمبر 2 کے قریب گاڑی سوار نامعلوم مسلح ملزمان نے پولٹری کا کاروبارہ کرنے والے شہری کی گاڑی کوروکا اور اسلحے کے روز پران سے 25 لاکھ روپے چھین لیے اور مزاحمت پر فائرنگ کرتے ہوئے فرار ہو گئے فائرنگ کے نتیجے میں سکیورٹی گارڈ سرپر گولی لگنے سے شدید زخمی ہو گیا جسے فوری طور پر اسپتال منتقل کردیا گیا ہے ۔ایس ایس پی نے بتایا کہ پولیس نے موقع پر سے سی سی ٹی وی فوٹیج حاصل کرلی ہیں، کرائم سین سے شواہد اکٹھا کیے جا رہے ہیں اورپولیس نے جائے وقوع کی جیو فینسنگ بھی کرالی ہے ، پولیس نے ٹیکنیکل اور ہیومن انٹیلی جنس کے ذریعے تفتیش کا آغاز کردیا ہے ، اگلے 24 گھنٹوں میں پولیس ملزمان تک پہنچنے کی کوشش کرے گی۔ پولٹری کاکاروبارکرنے والے متاثرہ شہری فرحان نے بتایا کہ وہ صبح گھر سے 25 لاکھ روپے بینک میں جمع کرانے جا رہا تھا کہ راستے میں مسلح ملزمان رقم لوٹ کر فرار ہو گئے مسلح ملزمان کی تعداد 3 سے 4 تھی جو کہ سفید رنگ کی گاڑی میں سوار تھے ۔
