شارع فیصل پرحادثے کے ملزم کا جسمانی ریمانڈ
کراچی(اسٹاف رپورٹر)جوڈیشل مجسٹریٹ شرقی نے شارع فیصل پر گاڑی کی ٹکر سے میاں بیوی کی ہلاکت کے مقدمے میں ملزم کو 3 روزہ جسمانی ریمانڈ پر پولیس کے حوالے کردیا۔ مدعی کے وکیل نے موقف اختیار کیا۔۔
کہ ملزم سڑکوں پر ریس لگا رہے تھے ۔ وکیل صفائی نے کہا کہ اگر ریس لگا رہے تھے تو دوسری گاڑیاں کہاں ہیں؟۔ دوران سماعت وکلا کی آپس میں تلخی پر عدالت نے اظہار برہمی کیا۔ تفتیشی افسر نے بتایا کہ ملزم کی کار کی ٹکر سے 2 لوگ ہلاک ہوئے ہیں۔ عدالت نے استفسار کیا کہ آپ کی عمر کیا ہے ، جس پر ملزم نے بتایا کہ میری عمر 16 سال ہے ۔ تفتیشی افسر نے بتایا کہ ملزم کی عمر 17 سال ہے ۔ ملزم نے بیان دیا کہ گاڑی میں چلا رہا تھا، دوست سعد کی گاڑی تھی۔ عدالت نے ریمارکس دیے کہ ملزم کی عمر کا تعین کیا جائے ۔ جو گاڑی کا مالک ہے ، اسے بھی پیش کیا جائے ۔ اس نے ایک نابالغ کو گاڑی کیوں دی۔
