خانیوال میں سڑکوں کی بحالی،313ملین منظور
ملتان(وقائع نگار خصوصی)کمشنر ملتان ڈویژن عامر کریم خان کی زیر صدارت ڈویژنل ڈویلپمنٹ ورکنگ پارٹی کا اہم اجلاس منعقد ہوا۔۔
، جس میں ڈویژن بھر کی جاری اور نئی ترقیاتی سکیموں کا جائزہ لیا گیا اور متعدد منصوبوں کی منظوری دی گئی ۔اجلاس سے خطاب کرتے ہوئے کمشنر عامر کریم خان نے کہا کہ عوام کے ٹیکس کا پیسہ قیمتی امانت ہے ، جسے بچانے اور مؤثر استعمال کے لئے ترقیاتی منصوبوں کو مقررہ مدت میں مکمل کیا جانا ناگزیر ہے ۔ انہوں نے تمام محکموں کو ہدایت کی کہ منصوبوں کی تکمیل میں معیار (کوالٹی)پر کوئی سمجھوتہ نہ کیا جائے اور وقت پر مکمل کیا جائے تاکہ عوام کو بروقت سہولیات فراہم کی جا سکیں۔اجلاس میں خانیوال شہر کی متحدہ سڑکوں کی بہتری و بحالی کی سکیم کی 313.2 ملین روپے کی لاگت سے ریوائزڈ اپروول دی گئی۔ اسی طرح وہاڑی شہر کے مختلف زونز کی سڑکوں کی بحالی اور اپ گریڈیشن کے منصوبوں کی بھی منظوری دی گئی، جن میں سنٹرل زون 311.9 ملین روپے مغربی زون 236.8 ملین روپے مشرقی زون 247 ملین روپے شامل ہیں۔اس کے علاوہ خانیوال کے علاقے چوک جمال میں 207 ملین روپے کی لاگت سے رورل ہیلتھ سینٹر کی تعمیر و تکمیل کی اجازت دی گئی، جس سے علاقے میں صحت کی سہولیات میں نمایاں بہتری آئے گی۔اجلاس میں متعلقہ ترقیاتی محکموں کے افسر بھی شریک تھے ، جنہوں نے سکیموں کی موجودہ صورتحال پر بریفنگ دی۔
