2025: ایف آئی اے میں اندرونی احتساب پر اہلکاروں کو سزائیں
اسلام آباد: (دنیا نیوز) ڈائریکٹر جنرل ایف آئی اے رفعت مختار راجہ کی ہدایت پر ادارے میں اندرونی احتساب کا عمل جاری، ڈائریکٹوریٹ آف انٹرنل اکاونٹبیلیٹی نے سال 2025 کے دوران مجموعی طور پر 271 اہلکاروں کو سزائیں سنائیں۔
بدعنوانی، نظم وضبط کے خلاف ورزی اور اختیارات سے تجاوز میں ملوث 88 افسران واہلکاروں کو ملازمت سے برطرف کیا گیا۔
برطرف ہونے والوں میں 2 ڈپٹی ڈائریکٹرز، 6 اسسٹنٹ ڈائریکٹرز، 13 انسپکٹرز، 20 سب انسپکٹرز شامل ہیں، 5 اے ایس آئی، 13 ہیڈ کانسٹیبل، 20 کانسٹیبل اور 9 منسٹریل سٹاف بھی برطرف ہونے والوں میں شامل ہے۔
سال 2025 کے دوران 1 اے ایس آئی، 2 کانسٹیبل اور 2 منسٹریل سٹاف کو ملازمت سے برخاست کیا گیا، 10 اہلکاروں کو عہدے کی تنزلی کی سزائیں سنائی گئیں۔
2025 کے دوران 1 ڈپٹی ڈائریکٹر، 2 اسسٹنٹ ڈائریکٹرز، 2 انسپکٹرز، 1 سب انسپکٹر کو عہدے کی تنزلی کی سزا سنائی گئی، 3 ہیڈ کانسٹیبلز اور 1 کانسٹیبل کو عہدے کی تنزلی کی سزا سنائی گئی۔
گزشتہ سال 168 افسران و اہلکاروں کو ترقی روکنے اور دیگر معمولی سزائیں سنائی گئیں۔
ڈی جی ایف آئی اے رفعت مختار راجہ نے کہا کہ محکمانہ احتساب کا مقصد قانونی اور پیشہ ورانہ معیارات پر سختی سے عمل کو یقینی بنانا ہے، کسی بھی قسم کی بدعنوانی یا اختیارات کے ناجائز استعمال کو ہرگز برداشت نہیں کیا جائے گا۔
رفعت مختار راجہ نے کہا کہ کرپشن، غفلت اور ناقص تفتیش میں ملوث اہلکاروں کی ایف آئی اے میں کوئی جگہ نہیں ہے، ادارے کو کرپشن اور کالی بھیڑوں سے پاک کرنے کے لیے سخت احتسابی عمل جاری ہے۔
ڈی جی ایف آئی اے نے کہا کہ غیر قانونی سرگرمیوں میں ملوث اہلکاروں کے خلاف سخت اقدامات کیے جا رہے ہیں، احتسابی عمل سے ہی انسانی سمگلنگ اور کرپشن کا خاتمہ ممکن ہوگا، غفلت برتنے والے افسران کو قرار واقعی سزا دی جائے گی۔
