قومی ٹی 20کپ: ایبٹ آباد اور ملتان کی سیمی فائنل میں رسائی
فیصل آباد (خصوصی رپورٹر)ایبٹ آباد اور ملتان کی ٹیمیں قومی ٹی 20 کپ کے سیمی فائنل میں پہنچ گئیں، اقبال سٹیڈیم فیصل آباد میں کھیلے گئے پہلے کوارٹرفائنل میں ایبٹ آباد نے لاہور وائٹس کو 6 وکٹوں سے شکست دی۔۔
دوسرے کوارٹرفائنل میں ملتان نے دفاعی چیمپئن کراچی وائٹس کو 7 رنز سے ہرا یا۔ پہلے کوارٹرفائنل میں ایبٹ آباد نے ٹاس جیت کر لاہور وائٹس کو بیٹنگ دی جس نے 20 اوورز میں 5 وکٹوں پر 130 رنز بنائے ۔محمد اخلاق 59 رنز بناکر ٹاپ سکورر رہے ۔خالد عثمان نے دو وکٹیں حاصل کیں، ایبٹ آباد نے 18 ویں اوور میں4 وکٹوں کے نقصان پر مطلوبہ ہدف پورا کرلیا۔ کامران غلام نے 2 چھکوں اور 6 چوکوں کی مدد سے 58 رنز ناٹ آؤٹ کی اننگز کھیلی اور پلیئر آف دی میچ قرار پائے ،دوسرے کوارٹرفائنل میں ملتان نے ٹاس جیت کر پہلے بیٹنگ کرتے ہوئے 9 وکٹوں پر 155 رنز بنائے ۔ذیشان اشرف نے 9 چوکوں اور 3چھکوں کی مدد سے 60 رنز سکور کیے ۔سعود شکیل اور ہارون ارشد نے دو دو وکٹیں حاصل کیں، جواب میں کراچی وائٹس8 وکٹوں پر 148 رنز بناسکی۔ ہارون ارشد42 رنز بناکر ٹاپ سکورر رہے ۔کپتان سعود شکیل صفر اور شان مسعود 3 رنز پر آؤٹ ہوگئے ۔ محمد اسمعیل نے 34 رنز دے کر 3 وکٹیں حاصل کیں۔فیصل اکرم نے دو کھلاڑی آؤٹ کیے ،ذیشان اشرف پلیئر آف دی میچ قرار پائے ۔
