عید کے بعد وزیراعظم اے پی سی بلائیں گے :بیرسٹر عقیل
اسلام آباد (دنیا نیوز)مشیر برائے قانون و انصاف بیرسٹر عقیل ملک نے کہا ہے کہ عید کے بعد وزیراعظم اے پی سی بلائیں گے ۔دنیا نیوزکے پروگرام ‘‘ٹونائٹ ود ثمرعباس’’میں گفتگو کرتے ہوئے بیرسٹر عقیل ملک کا کہنا تھا کہ ملک میں پہلے سے انسداد دہشتگردی کی عدالتیں موجود ہیں۔
نوازشریف کے دورمیں آپریشنز ہوئے اور ہم نے دہشتگردی سے جان چھڑائی، فوجی عدالتوں سے متعلق آئینی ترمیم کی بات قبل ازوقت ہے ۔انہوں نے کہا کہ دہشتگردی سے متعلق ساری سیاسی قیادت کا بیٹھنا ضروری ہے ، ویڈیولنک کے ذریعے بانی پی ٹی آئی کواے پی سی میں لایاجا سکتا ہے ، پی ٹی آئی کے ساتھ کوئی زیادتیاں نہیں ہورہیں۔مشیر برائے قانون و انصاف کا کہنا تھا کہ جے آئی ٹی میں جو کچھ نکل رہا ہے اس کا تعلق اڈیالہ سے جڑ رہاہے ، کسی کی خواہش پر بانی پی ٹی آئی کو جیل سے نہیں نکالا جائے گا، خواہشیں تو بہت ہیں لیکن ہر خواہش پوری نہیں ہو سکتی۔بیرسٹر عقیل ملک نے مزید کہا کہ امید ہے مولانا فضل الرحمن قومی مفاد کے ساتھ کھڑے ہوں گے ، ریاست کے خلاف مہم ڈیجیٹل دہشتگردی ہے ۔
