لیگل ریفارمز کیلئے وفاق اورصوبے مشاورت سے کام کرنے پر متفق
اسلام آباد (اپنے نامہ نگار سے ، اے پی پی) وزیراعظم کی ہدایت پر نظرثانی شدہ نیشنل ایکشن پلان کے تحت انسداد دہشتگردی، پرتشدد انتہا پسندی کے جائزے اور قانونی خلا پر کرنے کیلئے تشکیل دی گئی کمیٹی کا پہلا اجلاس ہوا۔
وفاقی وزیر قانون کی زیرِ صدارت صوبائی وزرائے قانون اور فیڈرل سیکرٹری قانون نے شرکت کی، صوبائی نمائندوں نے وفاقی حکومت کی جانب سے کریمنل ریفارمز کو سراہا۔ اجلاس میں طے کیا گیا کہ باہمی مشاورت کے ساتھ ہنگامی بنیادوں پر لیگل ریفارمز پر کام کیا جائے گا، انصاف کی فراہمی کیلئے اصلاحات متعارف کرائی جائیں گی تا کہ دہشتگردی سے متعلق کیسز کا جلد سے جلد فیصلہ ہو سکے ، وزیر قانون اعظم نذیر تارڑ نے کہا صوبوں میں عدلیہ کوتحفظ فراہم کیا جائے تا کہ ججز بنا کسی پریشر کے فیصلے کر سکیں، انہوں نے پراسیکیوٹرز اور انویسٹیگیشن آفیسرز کی کارکردگی بہتر بنانے کیلئے ٹریننگز کے انعقاد پر زور دیا اور صوبوں میں سٹیٹ آف دی آرٹ فورینسک ایجنسیز اور لیبز بنانے کی ہدایت کی، وزیر قانون نے کہا وفاق اور صوبوں کو ملک کی بہتری کیلئے اصلاحات پر مل کر کام کرنا ہوگا۔
