آئینی ادارے حدود میں کام کریں یہی جمہوری نظام کی بقا :فضل الرحمن
کراچی(مانیٹرنگ ڈیسک)جمعیت علمائے اسلام کے سربراہ مولانا فضل الرحمن نے کہا ہے آئین ہی ریاست کی اصل طاقت ہے ، آئینی ادارے اپنی حدود میں رہ کر کام کریں یہی جمہوری نظام کی بقا ہے ۔
جے یوآئی سندھ کے ترجمان سمیع سواتی کے مطابق سپریم کورٹ بار ایسوسی ایشن کے صدر میاں رؤف عطا کی قیادت میں بلوچستان ہائیکورٹ بار کے صدر میر عطا اللہ خان لانگو، سندھ ہائیکورٹ بار کے صدر سرفراز میتلو اور سابق صدر سندھ ہائیکورٹ بار سلیم منگریو سمیت وکلا کے وفد نے کراچی میں راشد سومرو کی رہائش گاہ پر مولانا فضل الرحمن سے ملاقات کی۔ ملکی و علاقائی سیاسی صورتحال پر تفصیلی تبادلہ خیال کیا گیا۔مولانا فضل الرحمن نے کہا آئین ہی ریاست کی اصل طاقت ہے اور اسکی بالادستی ہر حال میں قائم رہنی چاہئے ۔ترجمان نے بتایا پارٹی اور وکلا قیادت نے عدلیہ، آئین اور جمہوریت کے دفاع پراتفاق کیا گیا۔ ملاقات میں ضیاالرحمن، مولانا راشد محمود سومرو، اسلم غوری، قاری عثمان اور دیگررہنما بھی شریک ہوئے ۔
