شدید گرمی میں 14 گھنٹے کی طویل لوڈشیڈنگ ، شہری بلبلا اٹھے ، کاروبار تباہ ، طلبا پریشان
کراچی(مانیٹرنگ ڈیسک)شدید گرمی نے شہر قائد کو اپنی لپیٹ میں لے رکھا ہے جب کہ اس دوران کے الیکٹرک کی جانب سے مختلف علاقوں میں لوڈشیڈنگ سے شہریوں کی اذیت میں اضافہ ہو رہا ہے ۔
بیشتر علاقوں میں اعلانیہ اور غیر اعلانیہ طور پر 14، 14 گھنٹے کی لوڈشیڈنگ کا سلسلہ جاری ہے ، جس کے نتیجے میں نہ صرف شہری شدید گرمی کی وجہ سے مختلف امراض کا شکار ہو رہے ہیں، وہیں بچوں کی تعلیمی سرگرمیاں بھی شدید متاثر ہو رہی ہیں۔میٹرک بورڈ کے امتحانات بھی کراچی میں جاری ہیں اور کئی علاقوں میں پرچوں کے دوران لوڈشیڈنگ کی اطلاعات بھی ہیں، دریں اثنا مسلسل کئی کئی گھنٹے کی لوڈشیڈنگ سے شہریوں کا کاروبار تباہ ہوکر رہ گیا ہے ۔ شہریوں کے مطابق کئی علاقوں میں لوڈشیڈنگ کا مجموعی دورانیہ 14 گھنٹے تک پہنچ چکا ہے ۔ یہاں تک کے رات 12 بجے بھی مختلف علاقوں میں لوڈشیڈنگ کی وجہ سے شہری سکون کی نیند کو ترس گئے ہیں۔ لوڈشیڈنگ سے جو علاقے زیادہ متاثر ہیں ان میں کورنگی ، لانڈھی، شاہ فیصل کالونی، ملیر، سرجانی ٹاؤن، اورنگی ٹاؤن، کیماڑی، لیاری، محمود آباد، ناظم آباد،صدر ، لائنز ایریا سمیت دیگر کئی علاقے شامل ہیں۔یاد رہے کہ میٹرک امتحانات کے دوران شہر کے مختلف علاقوں میں واقع اسکولوں میں قائم امتحانی مرکز میں لوڈ شیڈنگ کے باعث شدید گرمی کے سبب امتحان دینے والی متعدد طالبات کو پریشانی کا سامنا ہے ۔غیر اعلانیہ لوڈشیڈنگ سے متاثرہ علاقوں کے مکین طلبا و طالبات کا کہنا ہے کہ بجلی کی بندش کے باعث امتحانات کی تیاری میں مشکلات کا سامنا ہے۔
