جیل انڈسٹری میں کام کرنیوالے قیدیوں کو معاوضہ ملنا شروع
لاہور(سیاسی نمائندہ)وزیراعلیٰ پنجاب کے جیل ریفارمز ایجنڈا کے تحت ترجمان محکمہ داخلہ کے مطابق جیل انڈسٹری میں کام کرنے والے قیدیوں کو معاوضہ ملنا شروع ہو گیا ہے اور مختلف جیلوں میں ہنر مند قیدی اپنے اہلخانہ کی کفالت کے قابل ہو گئے ہیں۔
ڈسٹرکٹ جیل شاہ پور میں قیدیوں کو نوروزی چپل کی تیاری پرعید سے قبل معاوضہ دیدیا گیا، قیدیوں کے ہاتھوں تیار کردہ نوروزی چپل مارکیٹ میں فروخت ہو رہی ہے جسکی فروخت سے حاصل ہونے والی اجرت براہِ راست قیدیوں کے ذاتی اکاؤنٹس میں جمع ہوتی ہے ۔ سپرنٹنڈنٹ جیل ابوبکر عبداللہ نے بتایا ماہرین کے زیر نگرانی قیدیوں نے اعلیٰ معیار کی نوروزی چپل تیار کرنا سیکھی جواپنی خوبصورتی، معیار اور پائیداری میں منفرد ہے ۔ ترجمان محکمہ داخلہ نے بتایا قیدیوں کو ہنر مند بنا کر انکے روشن مستقبل کی راہیں ہموار کر رہے ہیں اور ہنرمند قیدی رہائی کے بعد بھی معاشرے کا مفید حصہ ہونگے ۔ گوجرانوالہ چیمبر آف کامرس قیدیوں کی تیار کردہ پراڈکٹس کی فروخت، کسٹمر سروس اور ڈیلیوری میں معاون ہے ۔ پنجاب بھر کی جیلوں میں قیدی مختلف مصنوعات تیار کر رہے ہیں۔ جیلوں میں اعلیٰ معیار کا فرنیچر، قالین، ہینڈی کرافٹس، برتن، پیپر، ٹائلیں، فینائل، پرفیوم، صابن، ایل ای ڈی بلب، ٹشو پیپرز، فٹبال وغیرہ تیار ہو رہے ہیں۔ قیدیوں کو موٹر مکینک، حجام، خانساماں، بیوٹیشن اور آئی ٹی کے کورسز بھی کرائے جا رہے ہیں۔
