علی امین گنڈ اپورکے کہنے پر اسسٹنٹ ایڈووکیٹ جنرل کااستعفیٰ دینے سے انکار ،آڈیو لیک
پشاور(مانیٹرنگ ڈیسک )پی ٹی آئی کے رکن قومی اسمبلی عاطف خان کے خلاف اینٹی کرپشن انکوائری کیس میں پیش ہونے والے ایڈیشنل ایڈووکیٹ جنرل سے استعفیٰ طلب کر لیا گیا تاہم انہوں نے مستعفی ہونے سے انکار کر دیا ۔
تفصیلات کے مطابق انصاف لائرز فورم کے صدر قاضی انور ایڈووکیٹ اور ایڈیشنل ایڈووکیٹ نوروز خان کی مبینہ آڈیو لیک سامنے آئی ہے ، جس میں قاضی انور عاطف خان کے خلاف کیس میں کمزور دلائل پر اے اے جی نوروز خان سے وزیر اعلیٰ کی ناراضی کا ذکر کر رہے ہیں۔قاضی انور مبینہ آڈیو میں کہتے ہیں کہ وزیر اعلیٰ کی ہدایت ہے کہ نوروز خان سے استعفیٰ لیں، انہوں نے نوروز سے کہا سماعت کے دوران آپ نے کمزرو دلائل دئیے جو آرڈر شیٹ میں بھی آ گئے ہیں، آرڈر شیٹ میں لکھا ہے فریقین آپس میں کمپرومائز کر رہے ہیں، وزیر اعلیٰ نے اُسی دن کہا آپ کو ہٹایا جائے ۔ایڈیشنل ایڈووکیٹ جنرل نوروز خان نے پی ٹی آئی رہنما عاطف خان کو آڈیو پیغام میں کہا کہ میں نے آپ کے کیس میں ملتوی ہونے پر اعتراض نہیں کیا تھا، یہ کہتے ہیں کہ اس کیس کو نمٹانا چاہئے تھا، ملتوی نہیں کرنا چاہئے تھا اور کیس ملتوی کرنے پر مجھے سزا دے رہے ہیں۔میں استعفیٰ نہیں دے رہا، اب یہ جعلی دستخط سے میرا استعفیٰ تیار کر رہے ہیں، میں نے متعلقہ دفاتر کو کہا ہے کہ استعفے کا نوٹیفکیشن آئے تو تصدیق کئے بغیر پروسس نہ کیا جائے ۔نوروز خان نے دو ٹوک انداز میں کہا میں ایڈووکیٹ جنرل آفس میں ذمہ داری نبھا رہا ہوں، استعفیٰ نہیں دوں گا۔
