بند گلی میں نہیں،بانی پی ٹی آئی کو آفرز ہورہی ہیں:رؤف حسن
لاہور(مانیٹرنگ ڈیسک)رہنما پی ٹی آئی رؤف حسن نے کہا عمران خان نے کبھی بھی مذاکرات کا راستہ بند نہیں کیا،سواتی صاحب کوشش کر رہے ہیں ، ہماری پالیسی ہے کہ اسٹیبلشمنٹ سے بات چیت ہونی چاہئے ،میری بھی یہی پالیسی ہے کہ بات چیت کا سلسلہ ہونا چاہئے ،راستہ ہمیشہ کھلا رکھا ہے۔
سواتی صاحب جو کوشش کر رہے ہیں وہ اپنی جگہ کررہے ہیں، پروگرام‘ٹونائٹ ودثمرعباس’میں گفتگو کرتے ہوئے رؤف حسن نے کہا اس پر میری رائے ہے کہ یہ معاملہ عوامی بحث کا حصہ نہ بنے ، وہ پی ٹی آئی کا حصہ ہیں وہ جو کریں گے پارٹی کی ڈومین میں رہ کرکریں گے ۔ایک سوال کے جواب میں کہا ہے کہ تحریک انصاف آج بھی کسی ڈیل کے متلاشی نہیں ہے ، ہم آئین وقانون کے مطابق ریاست سے ڈائیلاگ کرنا چاہتے ہیں، عمران خان کو ڈیل کرنی ہوتی تو وہ 2 سال جیل میں نہ رہتے ۔ رؤف حسن نے کہا ہے کہ پچھلے دنوں میں بھی بانی پی ٹی آئی کو آفرز ہوئی ہیں،ہم بند گلی میں نہیں ہیں، ہمارے راستے کھلے ہوئے ہیں، ہم بہت کچھ کر سکتے ہیں، ہم نے کبھی مذاکرات کیلئے دروازے بند نہیں کیے ۔ایک اور سوال کے جواب میں رؤف حسن کا کہنا تھا کہ پی ٹی آئی میں کوئی اختلافات نہیں، مختلف رائے ضرور ہے ، مولانافضل الرحمن کی حمایت سے متعلق 15 تاریخ کا وقت ہے ، مولانا فضل الرحمن ساتھ نہ ہوئے تب بھی ہماری تحریک شروع ہو جائے گی۔
