چاند رات اور عید کیلئے جامع سکیورٹی پلان تیار ، 15 سو سے زائد افسر اور اہلکار تعینات
سرگودھا(سٹاف رپورٹر)ضلعی پولیس آفیسر سرگودھا محمد صہیب اشرف کی ہدایت پر سرگودھا پولیس کی جانب سے چاند رات اور عید الفطر کے لیے جامع سکیورٹی پلان اور ٹریفک پلان کے مطابق 15 سو سے زائد۔۔۔
پولیس افسر اور جوان ضلع بھر میں امن و امان کے قیام کو برقرار رکھنے اور عوام کی جان و مال کے تحفظ کے لیے آج سے ڈیوٹیاں سنبھال لیں گے ڈی پی او سرگودھا نے تمام ڈی ایس پیز اور ایس ایچ اوز کو ہدایات جاری کی ہیں کہ ضلع کے تمام داخلی و خارجی راستوں پرناکہ بندیاں قائم کرکے چیکنگ کے عمل کو سخت کیا جائے ۔انکا کہنا تھا کہ ضلع میں داخل ہونے والی تمام گاڑیوں اور ان میں موجود سامان کی مکمل چیکنگ کے ساتھ ساتھ مشکوک افراد کی نقل و حرکت پر کڑی نظر رکھی جائے اور سماج دشمن عناصروں کیخلاف بھرپور کاروائیاں بھی جاری رکھی جائیں،چاند رات پر ہوائی فائرنگ اور آتش بازی اور ون ویلنگ جیسے خونی کھیل کی سخت ممانعت ہے ۔اس سلسلے میں تمام ڈی ایس پیز صاحبان کو سختی سے تاکید کی گئی ہے کہ جس بھی علاقے سے بھی ہوائی فائرنگ اور ون ویلنگ کی شکایت موصول ہوئی تو متعلقہ تھانے کے ایس ایچ او کے خلاف محکمانہ ایکشن لیا جائے گا۔اس کے علاوہ ڈی ایس پیز صاحبان کو ہدایت کی گئی کہ عید الفطرکے اجتماعات کی سکیورٹی کو فل پروف بنانے کے لئے تمام عید گاہوں اور بڑی مساجد میں سفید کپڑوں میں بھی پولیس اہلکار تعینات کئے جائیں۔چاند رات کو تمام ٹریفک سٹاف ڈیوٹی کے فرائض سرانجام دیگا۔
