ملکی معیشت کیلئے کپاس کی بحالی ضروری،افتخار علی سہو
ملتان(وقائع نگار خصوصی)ملکی معیشت کیلئے کپاس کی بحالی ناگزیر ہے ۔ کپاس کی بحالی ایک چیلنجنگ ٹاسک ہے ۔۔
ان خیالات کا اظہار سیکرٹری زراعت پنجاب افتخار علی سہو نے کپاس کی منافع بخش پیداوار بارے ایگریکلچر ہاؤس میں منعقدہ اعلیٰ سطحی اجلاس کی صدارت کرتے ہوئے کیا۔ اجلاس میں بی سی آئی کی عالمی چیف آپریٹنگ آفیسر میڈم لینا اسٹا فگارڈ کی سربراہی میں دفد نے شرکت کی۔اس موقع پر سیکرٹری زراعت پنجاب نے کہا کہ صوبہ پنجاب میں رواں سیزن کے دوران35 لاکھ ایکڑرقبہ پر کپاس کی کاشت کا ہدف حاصل کر لیا جائے گا۔انھوں نے مزید کہا کہ پہلے مرحلہ کے دوران 8 لاکھ ایکڑ رقبہ پر کپاس کی کاشت مکمل ہو چکی ہے ۔کپاس کی کاشت کے دوسرے مرحلے کی کامیابی کیلئے فیلڈ سرگرمیوں میں مزید تیزی لائی جاچکی ہے ۔سیکرٹری زراعت پنجاب نے کہا کہ حکومت پنجاب کو بی سی آئی سے بھرپور تعاون کی اُمید ہے ۔محکمہ زراعت پنجاب اور بی سی آئی کا باہمی تعاون کپاس کی منافع بخش اور ماحول دوست پیداوار کیلئے اہمیت کا حامل ہے ۔عالمی سطح پر کپاس کی جدید پیداواری ٹیکنالوجی ٹرانسفر میں بی سی آئی کا کردار قابل ستائش ہے ۔انھوں نے کہا کہ ملٹی سٹیک ہولڈرز پلیٹ فارمز کو دوبارہ فعال کرنے کے لئے بی سی آئی کے کردار کے خواہاں ہیں۔مقامی و بین الاقوامی اداروں،این جی اوز اور پرائیویٹ سیکٹر کی شراکت داری سے ہی کپاس کا بہتر مستقبل منسلک ہے ۔
