کاشتکاروں کو جو مشکلات ہیں حکومت آ گاہ ہے : ڈاکٹر ذوالفقار
سرگودھا(سٹاف رپورٹر) وفاقی پارلیمانی سیکرٹری برائے تجارت و ایم این اے ڈاکٹر ذوالفقار علی بھٹی نے کہا ہے کہ حکومت کی جانب سے آسان شرائط پر ٹریکٹرز کی فراہمی کسان کے زندگی میں انقلاب لانے کے لیے اہم کردار ادا کرے گا۔
اس وقت پاکستان کے کاشتکاروں کو جو مشکلات ہیں حکومت اس سے بخوبی آگاہ ہے ۔ اس امر کا اظہار انہوں نے محکمہ زراعت کے دفتر میں خوش نصیب کسانوں میں ٹریکڑز کے کاغذات تقسیم کرنے کی تقریب سے خطاب کرتے ہوئے کیا۔ وفاقی پارلیمانی سیکرٹری نے کہا کہ وزیراعلی پنجاب مریم نواز شریف نے جس طرح مختلف شعبہ مین انقلابی اقدامات اٹھائے ہیں اس کے مثبت نتائج سامنے آنا شروع ہو چکے ہیں۔اس وقت پاکستان کی تاریخ میں سب سے زیادہ بہتر انداز میں کام کرنے والی وزیراعلی کا اعزاز مریم نواز شریف کے سر ہے جنہوں نے مختلف شعبہ زندگی کے لوگوں کے لیے آسانیاں پیدا کی ہیں گھر کی تعمیر ہو یا کاروبار ٹریکٹر کی تقسیم ہو یا شعبہ صحت کے حوالہ سے محترمہ مریم نواز کے انقلابی اقدامات پنجاب کو تمام صوبوں میں نمایاں کر رہے ہیں آج ٹریکٹرز تقسیم کرنے کی تقریب بھی اس کا منہ بولتا ثبوت ہے ۔ ڈاکٹر ذوالفقار علی بھٹی نے کہا کہ اس وقت پاکستان کا کاشتکار مشکلات کا شکار ضرور ہے مگر اس کے لیے حکومت نے بہت سی آسانیاں پیدا کی ہیں جس میں آسان شرائط پر ٹریکٹرز کی تقسیم کھاد بیج اور دیگر زرعی قرضہ جات بھی اسی سلسلہ کی کڑی ہے۔
