اپوزیشن کو دیوار کے ساتھ لگایا جا رہا ہے: شبلی فراز
اسلام آباد: (دنیا نیوز) سینیٹ میں اپوزیشن لیڈر شبلی فراز نے کہا کہ ایوان کو راجواڑہ بنا دیا گیا، اپوزیشن کو دیوار کے ساتھ لگایا جا رہا ہے۔
سینیٹ اجلاس سے اظہار خیال کرتے ہوئے اپوزیشن لیڈر شبلی فراز نے کہا کہ ایوان میں پریزائیڈنگ افسران کا رویہ مناسب نہیں ہوتا، ہمارے سوالات نظر انداز کر دیئے جاتے ہیں، ہمارے سوالات پیش نہ کرنا تشویشناک ہے، میں چیئرمین صاحب آپ کو سوالات کی فہرست بھیجوں گا۔
شبلی فراز نے کہا کہ کل پیپلز پارٹی کے پارلیمانی لیڈر نے اپوزیشن کو بتائے اوردکھائے بغیر قرارداد پیش کر دی، ہمیں دکھایا جاتا تو ہم بھی قرارداد کو سپورٹ کرتے۔
یہ بھی پڑھیں: فون ٹیپنگ کا کوئی قانون موجود نہیں، جو ہو رہا وہ غیر قانونی ہے: اسلام آباد ہائیکورٹ
انہوں نے کہا کہ ٹھیک ہے ایوان میں آپ کا نمبر زیادہ ہے مگر جمہوری روایات ہوتی ہیں، آج آپ کو ہماری ضرورت نہیں کل ہوگی، خود کو آپ لوگ جمہوری جماعت نہ کہیں پھر، ایسا محسوس ہونا چاہئے کہ ہم بھی اس ایوان کا حصہ ہیں۔
اپوزیشن لیڈر کی گفتگو کے دوران شیری رحمان نے بولنے کی کوشش کی، اپوزیشن لیڈر شبلی فراز نے سینیٹر شیری رحمان کو جھاڑ پلا دی اور کہا کہ آپ بیچ میں مت بولیں، چیئرمین سینٹ نے سینیٹر شیری رحمان کو اپوزیشن لیڈر کی تقریر میں بولنے سے منع کر دیا۔
