صوبائی وزیر راحیلہ درانی اور اسرار اللہ زہری کی اختر مینگل سے ملاقات دھرنا ختم کرنے سے انکار
کوئٹہ مستونگ (سٹاف رپورٹر،نامہ نگار )بی این پی(عوامی)کے سربراہ میر اسراراللہ خان زہری نے لکپاس مستونگ میں جاری دھرنا گاہ میں بلوچستان نیشنل پارٹی کے سربراہ سردار اختر مینگل سے ملاقات کی ۔
اس موقع پر بی این پی (عوامی)کے مرکزی سینئر نائب صدر ٹکری نذر مینگل، میر عبد الرسول مینگل، ملک نصیر شاہوانی، رحیم مینگل، ثنابلوچ ودیگر رہنما بھی موجود تھے ۔ اسراراللہ زہری ودیگرنے سکیورٹی خدشات اورامن وامان کے پیش نظر اختر مینگل سے دھرنا ختم کرنے کامطالبہ کیا۔ دریں اثنا صوبائی وزیر راحیلہ درانی نے کہا ہے کہ ہم خواتین پارلیمنٹرین اختر مینگل کے پاس عوام کی مشکلات کے حل کیلئے دھرنا ختم کرانے گئی تھیں ،اختر مینگل نے سوال کیا کہ آپ کو کس نے بھیجا ہے ،ہم نے کہا کہ آپکے مطالبات میں کچھ معاملات عدالتوں میں ہیں جنکے فیصلوں کا انتظار کرناچاہئے مگرانہوں نے مطالبات کی منظور ی تک دھرنا ختم کرنے سے انکار کر دیا ۔
