یوم شہادت حضرت علی ؓکے حوالے سے سکیورٹی پلان جاری
فیصل آباد(سٹی رپورٹر)سٹی پولیس آفیسر فیصل آباد کی ہدایت پر 21 رمضان المبارک یوم شہادت حضرت علی کے حوالے سے سکیورٹی پلان جاری کردیاگیا۔
سٹی پولیس آفیسر کی ہدایت پر 21 رمضان المبارک یوم شہادت حضرت علی کے موقع پر ضلع بھر میں سکیورٹی کو ہائی الرٹ کر دیا گیا ہے ۔ضلع بھرمیں1829 پولیس اہلکار ڈیوٹی سرانجام دیں گے ،جبکہ ایلیٹ فورس اور ایس ایچ اوز شہر کے داخلی،خارجی راستوں پر اضافی پٹرولنگ کی ذمہ داریاں سرانجام دینگے ۔سٹی پولیس آفیسر نے کہا کہ یوم شہادت حضرت علی کے سلسلہ میں نکلنے والے 13 جلوسوں اور 39 مجالس کی سکیورٹی کو فول پروف بنانے کیلئے ضلع فیصل آباد میں سکیورٹی پلان کے مطابق18 جی اوز،225 اپرسبارڈینیٹ اور1586 کانسٹیبل ڈیوٹی کے فرائض سرانجام دیں گے ۔علاوہ ازیں ایلیٹ فورس اور ڈولفن فورس کی 52 ٹیمیں بھی شہر کے گردونواح کے اہم حساس مقامات پر گشت کرتی رہیں گی۔اس کے علاوہ پولیس فورس کی11 ریزور کو پولیس لائنز میں سٹینڈ ٹو رکھا گیا ہے ۔
