ڈی پی او چنیوٹ کی تھانہ کوٹ وساوا میں کھلی کچہری
چنیوٹ(ڈسٹرکٹ رپورٹر )ڈسٹرکٹ پولیس آفیسر چنیوٹ عبداﷲاحمد نے شہریوں کے مسائل ان کی دہلیز پر حل کرنے کیلئے تھانہ کوٹ وساوا میں کھلی کچہری کا انعقاد کیا۔۔۔
جس میں ڈی ایس پی سٹی ، تفتیشی افسران، میڈیا نمائندگان اور علاقہ کے لوگوں کی کثیر تعداد نے شرکت کی ۔ اس موقع پر ڈی پی او نے لوگوں کے مسائل سنے اور حل کے لیے موقع پر احکامات جاری کر دیئے ۔ڈی پی او چنیوٹ نے اس موقع پر گفتگو میں کہا کہ کھلی کچہری کا مقصد پولیس اور عوام کے درمیان اعتماد کی فضا کو مزید مستحکم کرنا ہے ،لوگوں کے مسائل ان کی دہلیز پر سننے کے لیے ضلع بھر میں کھلی کچہریوں کا سلسلہ جاری رہے گا ،سرکل ڈی ایس پیز اور ایس ایچ اوز لوگوں کے مسائل کے حل کے لیے مختلف علاقوں میں کھلی کچہریاں لگا رہے ہیں ۔ عبداللہ احمد نے مزید کہا کہ تمام پولیس اسٹیشنز میں بہترین سروس ڈیلیوری کے لیے پولیس ورک کو جدید خطوط پر استوار کیا گیا ہے ۔اب عوام کو پولیس دفاتر اور تھانوں میں پولیس سروسز کے حصول کے لیے بہترین ماحول میسر ہے ۔ لوگوں کی جان و مال اور عزت کی حفاظت کو یقینی بنانے کیلئے جرائم پیشہ عناصر کیخلاف کریک ڈاؤن جاری ہے ،امن و امان کے قیام کے لیے قانون کی بالا دستی ہر صورت یقینی بنائیں گے ۔
