ملتان ڈویژن: رمضان بازاروں میں بہترین انتظامات کیلئے افسران کو ٹاسک دیدیا گیا
چینی کی بلا تعطل فراہمی کیلئے زیادہ سے زیادہ ڈیلرز رجسٹر کر کے رمضان بازار مقرر کئے جائیں،ورک فورس تعینات کر کے ذخیرہ اندوزمافیا کی نگرانی کی جائے ،کمشنراختر محمود کی ہدایت
ملتان (وقائع نگار خصوصی)ماہِ صیام کی آمد کے سلسلے میں ڈویژنل انتظامیہ شہریوں کیلئے بہترین انتظامات اور گراں فروشوں،ذخیرہ اندوزوں کی سرکوبی بارے متحرک ہوگئی۔اس سلسلے میں۔کمشنر ملتان ڈویژن جاوید اختر محمود نے کیمپ آفس سے ویڈیو لنک کے ذریعے اجلاس کی صدارت کی۔کمشنر ملتان نے ڈویژن کے تمام 23 رمضان بازاروں میں بہترین انتظامات بارے افسران کو ٹاسک دیتے ہوئے کہا کہ رمضان بازاروں میں چینی کی بلا تعطل فراہمی کیلئے زیادہ سے زیادہ ڈیلرز رجسٹر کریں۔ڈیلرز کیلئے رمضان بازار مختص کئے جائیں اور ہر ڈیلر مقررہ رمضان بازاروں میں بلا تعطل چینی کی فراہمی کا ذمہ دار ہوگا۔رمضان بازاروں میں ورک فورس تعینات کرکے ذخیرہ اندوز مافیا کی کڑی نگرانی کی جائے ۔ہر رمضان بازاروں کا فوکل پرسن افسر مقرر کیا جائے ۔غیر معیاری اشیائیا قلت کی صورت میں رمضان بازار کا متعلقہ افسر ذمہ دار ہوگا۔کمشنر آفس، اضلاع کی انتظامیہ کے دفاتر میں کنٹرول رومز قائم کئے جائیں گے جہاں پر شہریوں کی شکایات کا فوری نوٹس لیکر ازالہ کیا جائے ۔کمشنر جاوید اختر محمود نے کہا کہ کورونا وبا کے خاتمے بارے بھی احتیاطی تدابیر اپنائی جائیں۔رمضان بازاروں میں کورونا وبا کنٹرول کے ایس او پیز پر عملدرآمد کروایا جائے ۔ کمشنر ملتان نے پرائس کنٹرول مجسٹریٹس کو ماہ صیام میں کارکردگی بہتر بنانے کا ٹاسک دیتے ہوئے کہا کہ تمام دکانوں پر ریٹ لسٹ آویزاں کروائی جائیں۔
